الصَبْر طَيب

( 1 )
يقولون الصبر طيّب..
( ورحمة ) تقول
إذا زاعلتها : طيّب!
وجدّي .. لا نِشدته ، كيف حالك..؟
قال لي :طيّب .
وأمي من شمال الأرض..
لا صاحت ، وش أخبارك..؟
أرد بساعْ أنا طيّب !
سعيد وخاطري طيّب ..
ويا كِثر الحكي الطيّب! .

( 2 )

تناســـــيت الكثير، وجيت أبذكر أطيَب الأصحاب
لقيت جحود، والتقصـــير حـارس من وراه أبواب
وشــعرت إن الــسراب أصدق من الكذبة مع الكذاب
وشفت إن القمر لا لاح فجــــــرٍ في عيوني غاب !
وعرفت إني أعيش أوهام عمري، والحصاد تراب
يبيك إللي يبيك ، ولا بغيــته فص ملح وذاب!
وأنا طيّب..سعيد وخاطري طيب..
ويا كثر الحكي الطيب


( 3 )

خذوني أو خذونـي ، ما بقى إلا شوي من طيبي
خذوه الله لا يجــــــزاه خير أسباب تعذيبي !
سرق دمعي سرق طبعي ، سرق حتى عذاريبي
تركني للوجيــــه الزيف ، أقابلها بترحيبي
أقول لســـــودها أهلا أقول لبيضها غيبي
وأقول الذنب موذنبي إذا كــــان الوفا عيبي !
وأنا طيّب.. سعيد وخاطري طيب
ويا كثر الحكي الطيّب

( 4 )

زماني آه يا زينه ، ويـــــــا شِيــنه إذا كشّر
مثل وجه الصــــــديق إللي خذل وإتنكّرْ وقصّر
زمانٍ كل ما جيـــــــت أطلبه ردّ الجميل أدبر
يخاويني على الحـــــلوه ، وإذا جتـني المراره فرْ !
غريب أغرب من الطيـــــبة عنيد أصلب من المرمر
ألا يا سُرع ما ينـــسى ، وألا يا صُـعب ما يذكر!
وأنا طيب.. سعيد وخاطري طيب..
ويا كثر الحكي الطيب



(5)

شمالي والكِــبرعنـــي جنـوبٍ والِفكر شرقا
وأنا في مغــرب الأيام ، أســامر شهقة الغرقى
ليَا طالت أطـــــاولها وأعَرْف الدرب والمرقا
وإلى طابت أخليـــها الوطـا، وأنا السما الزرقا
وسيع البال فيني هـــبال ونفس من الثلوج أنقى
ولي عينٍ تصُب حضور، وعينٍ تســكب الفرقا!
وأنا طيّب.. سعيد وخاطري طيب..
ويا كثر الحكي الطيّب


(6)

وصلت آخر مواصــــيل العيون، وقمت أمتعها
أذِل من الفراشة، والنســـــور السود أروّعها
أطيع إللي يطـــــيع ، وطلقة النيشان أطوعها
تلوعني المحاســــــن والعقول الصِدق ألوّعها
ودنيا ما تطبّعــــــــت بطبايعها أطبّعها
وصحرا ما درت باالوسم ،أعَرْف شلون أربّعها !
وأنا طيّب.. سعيد وخاطري طيب..
ويا كثر الحكي الطيب.

( 7 )


مجانين الهوى مثــــلي كثير، وِكلنا غاوي
أحد ماله طبيب إليا إنجرح ، وأحدٍ له مداوي
وأحد تكويه نيران الجــفا، وأحدٍ هو الكاوي
قصايدنا سنايدنا على مــــا قالها الراوي
إلى حنّت حملناها حــداوي ، تطرب الشاوي
وإلى غنّت نغنيها سـوى ، في جْو( جِداوي)!
وأنا طيب .. سعيد وخاطري طيّب..
ويا كثر الحكي الطيب


( 8 )

تغيّر كل ما في الكـــون، إلا إنتي وأنا والكون
ندور، ولا عرفنا كيـــف نوفي ولا عرفنا نخون
ولا ندري الوجود أعتـم ، أو إنّا إللي بدون عيون!
زرعنا إخلاصنـــا غيرة ، وشك وحيرةٍ وظنون
وقتلنا إحساسنا بإحساســنا بالشكل بالمضمون
وقلنا كان يا ما كان .. وِحــنا ما قدرنا نكون!؟
وأنا طيب .. سعيد وخاطري طيب ..
ويا كثر الحكي الطيب.

من روائع الدكتور صالح الشادي

هلا وغلا نور
بعض ما عندكم وآقل بكثير
آشكر لك هذا التواجد الآنيق كروحك
محبتي وتحيتي لروحك

انتقاء عذب كروحك
محبتي

آهلا بك ،،، وبإطلالتك الطيبة
لا عدمني الله وجودك الدافئ

نورت الموضوع اخ محمد
حياك الله