تقدم الدنيا لنا درس جديد في كل يوم

تقدم الدنيا لنا درس جديد في كل يوم ×××
والناس تسلم من غثى الدنيا بحفظ دروسها


وعلى حسب حفظ المواجيب وتعاليم السلوم ×××
نعرف مقاسات البشر في المرجله ونقوسها



صيت الرجال الوافية بافعالها والا الرخوم ×××
ينبيك عنها قل نفعتها وشين نفوسها


تطرد وراء الدنيا وتكشخ بالمواتر والهدوم ×××
مثل الحريم أغلب دراهمها على ملبوسها


والأمعه والشايب الكذاب وضعيف العزوم ×××
ناس مع العالم بلا هيبة تدربي روسها


والبخل خلانه بهايم لا تسام ولا تسوم ×××
لا شفتها ترفع يدك حمد وشكر وتبوسها


على الصحن هم أول الجلاس وآخر من يقوم ×××
يعيفك حلو الأكل والشرب طول جلوسها


ماهيب للازم سند ولا ذخر عند اللزوم ×××
تموت ما سرك مهايطها وكثر فلوسها


وسوالف الخبلان رفعة ضغط وصداع وهموم ×××
فلاوة تخطف علوم العرب وتحوسها


واجب عليك ليا حكت عن جملة حكاها تشوم ×××
الهند ما يرأس حكومتها سوى هندوسها


وربع المصالح والمجامل خوة ماهي بدوم ×××
أقولها والتجربة قطع وريدي موسها


وقت الرخا مثل الصقور اللي على المرقب تحوم ×××
فيٍّ يذري ساقة الرمضا وحر شموسها


ليا احتمت صقات بقعاء وامست علومك علوم ×××
تلوي اخششها وتجحد خوتك ودوسها


من عقب مانت الطيب وقدرك معزز ومحشوم ×××
تصير اردى ما خلق ربي ودم ضروسها


ابعد عن الأشكال ذي بعد الثرى عن النجوم ×××
ويش حاجتك في قرب رديان العرب ونجوسها


ماهوب بعيب ليا اعزومك ثقول ياالربع معزوم ×××
العيب لرحت لعزايمها وجيت عروسها


وخلك فطين تعلمك دنياك درس بكل يوم ×××
والرجل يسلم من غثا الدنيا بحفظ دروسها

​