انس السوالقه
عضو قوي
شعر شعبي عراقي للشاعر المبدع
علي الفريداوي...
اني اذا حبيت احبك من ضمير
روحي شمعه ليل تذبل من تحب
واذا اكرهك الله يستر من وراي
وضلت بكيفك تكمل ... تنسحب
تريد تعشك راح تلكاني ملاك
وحضن دافي
و ورد
و الوان
وعشب
وانت اذا رايد لعب
لعب
لعب
اهلا تعال
هاي سهله وحتى مابيها تعب
العبك والعب على الي لعبوا عليك
الي علمك تلعب اعلمه عاللعب
تريدني اسهل... سهل وياي صير
تريد تصعب... راح تلكاني صعب
تريد من عندي.. عشك انطي حنان
تريد من عندي ذهب .. تنطي ذهب
تريد من عندي وصل.. انطي وفاك
تريد تنطيني جذب
تــــــــــا خذ جذب
ولآن واحد قلبي
واحد يبقى بي
اني ماعندي حبيبين بقلب
اني مثل النار تنطيها تزيد
منها تاخذ راح من يمك تشب
عيني اذا مابيك تمليها حنان
راح من تروح لآجلك ماتصب
وباب قلبي اذا ماتحني بيديك
لو شلعت الباب ماتكدر تطب
تريد تكسرني صعب لين اصير
تريد تعصرني تلاكيني صلب
بكيفك اني شلون مارايدني اصير
جاهز اني ومنتظر عند الطلب
الخشب نفسه تريد تصنع بي خراب
تريد كرسي ملك تصنع بالخشب
اني طبعي ويه العشك نخله ويه كاع
اذا ماكو ماي ماتنطي رطب
وابد لا تستغرب الحب لو عذاب
هي رحمه ولابسه هدوم الغضب
الحب جرح لمن نداويه نحتويه
والجرح لما نهجره يلتهب
بالعشك كلشي اكو كلشي يصير
اكو بالغصباً
واكو لا مو بالغصب
لا تستغرب لآجل من تحبه تموت
بالعشك ماكو عجب بس العجب
ناس ماتت حتى الي تحبه يعيش
وناس عاشت لآجل التحبه يحب
بيوت عمرت بالعشك صارت قصور
وبالعشك نفسه نفسه الف بيت انخرب
اثنين يعني الحب اذا ثالث يفوت
حرف ثالث فات يتحول حرب
المثل مايضربونه اذا عاشق اسير
المثل مرات بالحب ينضرب
مو شكو حب ينتهي يعني صحيح
ومو شكو حب ينتهي يعني نصب
اكو حب ينتهي بس ذكراه يعيش
واكو حب يستمر بس اسمه انشطب
سبب حبك اذا تلكاه لاتكول
احلى حب لمن تحب اذا صدك
احلى حب لمن تحب اذا صدك
